ہے مری زیست ترے غم سے فروزاں جاناں

 ہے مِری زیست تِرے غم سے فروزاں جاناں 

کون کہتا ہے مجھے بے سر و ساماں جاناں 

تیری یادیں مِرے ہمراہ بہ ہر گام ہیں جب 

میں نے سمجھا ہی نہیں خود کو پریشاں جاناں 

نبض احساس بہت سست ہوئی جاتی ہے 

دل کو درکار ہے پھر درد کا پیکاں جاناں 

ہنستے ہنستے نظر آتے تھے جہاں غنچہ و گل 

ویراں ویراں سا لگے ہے وہ گلستاں جاناں 

اب نہ وہ سوز نہ وہ ساز ہے دل میں پھر بھی 

ایک آواز سی آتی ہے کہ جاناں جاناں 

ذکر ماضی سے گریزاں ہوں یہ سچ ہے لیکن 

یاد ہے آج بھی مجھ کو تِرا پیماں جاناں 

اتنی تنہائی کا احساس مسلسل ہو اگر 

اپنے سائے سے بھی ڈر جاتا ہے انساں جاناں 

تیرے ہاتھوں کی وہ مہندی وہ تِرا سرخ لباس 

اس تصور سے بھی دل ہے مِرا لرزاں جاناں 

ایک مدت ہوئی گو عہد بہاراں گزرے 

چاک ہے آج تلک میرا گریباں جاناں 

میں تجھے بھول نہ پایا تو یہ چاہت ہے مِری 

یاد رکھا ہے جو تُو نے تِرا احساں جاناں 

آج خالدؔ کے خیالات کی ہر راہ گزر 

ہے تِرے حسن کے پرتو سے چراغاں جاناں 

امان اللہ خالد