تیرے اتارے ہوئے دن

 تیرے اتارے ہوئے دن

ٹنگے ہیں لان میں اب تک

نہ وہ پرانے ہوئے ہیں

نہ ان کا رنگ اترا کہیں سے

کہیں سے کوئی بھی سیون ابھی نہیں اُدھڑی

الائچی کے بہت پاس رکھے پتھر پر

ذرا سی جلدی سرک آیا کرتی ہے چھاؤں

ذرا سا اور گھنا ہو گیا ہے وہ پودا

میں تھوڑا تھوڑا وہ گملا ہٹاتا رہتا ہوں

فقیرا اب بھی وہیں میری کافی دیتا ہے

گلہریوں کو بلا کر کھلاتا ہوں بسکٹ

گلہریاں مجھے شک کو نظر سے دیکھتی ہیں

وہ تیرے ہاتھوں کا مس جانتی ہوں گی

کبھی کبھی جب اترتی ہیں چیل شام کی چھت سے

تھکی تھکی سی ذرا دیر لان میں رک کر

سفید اور گلابی مسمبی کے پودوں میں ہی

گھلنے لگتی ہیں

کہ جیسے برف کا ٹکڑا پگھلتا جائے وہسکی میں

میں سکارف گلے سے اتار دیتا ہوں

تیرے اتارے ہوئے دن پہن کر اب بھی میں

تیری مہک میں کئی روز کاٹ دیتا ہوں

تیرے اتارے ہوئے دن ٹنگے ہیں لان میں اب تک

نہ وہ پرانے ہوئے ہیں نہ ان کا رنگ اترا

کہیں سے کوئی بھی سیون ابھی نہیں اُدھڑی

گلزار