جمال عکس محمدی سے فضائے عالم سجی ہوئی ہے

عارفانہ کلام نعتیہ کلام

جمال عکس محمدیﷺ سے فضائے عالم سجی ہوئی ہے

قرارِ جاں بن کے زندگی میں انہی کی خوشبو بسی ہوئی ہے

خدائے واحد کی بن کے برہاں حضورؐ آئے ہیں اس جہاں میں

دکھوں سے جلتی ہوئی زمیں پھر ہر ایک غم سے بری ہوئی ہے

نجانے کیسا کمال دیکھا،۔ نبیﷺ کا جس نے جمال دیکھا

حواس گم سم، نگاہ حیراں، زباں کو چپ سی لگی ہوئی ہے

سمندروں کی تہوں سے لے کر مقامِ سدرہ کی رفعتوں تک

مِرے نبیﷺ کے کرم کی چادر ہر اک جہاں پر تنی ہوئی ہے

تمام چاہت کے روگیوں کا عجیب ہم نے کمال دیکھا

جدا جدا صورتیں ہیں لیکن دلوں کی دھڑکن جڑی ہوئی ہے

وہی حقیقت میں زندگی ہے، وہی حقیقت میں بندگی ہے

جو میرے سرکارؐ کی محبت کے راستوں پر پڑی ہوئی ہے

انگشتری میں نگینہ جیسے، زمیں کے دل پر مدینہ جیسے

حضورؐ اس طرح آس تیری، مِری نظر میں جڑی ہوئی ہے

سعادت حسن آس