کلید نشاط
گوشہ نشینی کے چِلوں سے پرہیز
پھیکے زمانے کی تسبیح کے
طے شدہ سب وظیفوں سے بے لذتی
کار دنیا کی بے رنگ قوس قزح
ہانپتی زندگی کے وہی رات دن
میں نے دفتر سے کچھ روز وقفہ کیا
اور جنگل کی جانب کا رستہ لیا
میں تجھے ٹوٹ کے دیکھتا ہوں خدائے زمن
جھومتی شاخ پہ پھول کھلنے کی رنگینیاں
پیڑ کی ٹہنیوں پہ فلک سے اترتی ہوئیں بارشیں
اور بھیگے ہوئے جانور
بے تحاشا پرندے جو غوطے لگائیں کھلے آسماں میں
تو جھیلوں کی سب مچھلیاں تیرتی ہیں کھڑے پانیوں میں
مِرے گاؤں کے کھیت میں شارکیں باغ میں کوئلیں
غار کی تیرگی میں بسیرے ہیں چمگادڑوں کے
ہرن بد حواسی میں جیون کی خواہش کی تعبیر ہیں
ریگزاروں میں بارش نے سبزے کے فرشے کو
روشن کیا تو کئی رنگ کی تتلیاں
جھاڑیوں سے نمودار ہونے لگیں اور
آبی دھانوں پہ اک دوسرے کی زباں کو
سمجھتے ہوئے طائران فلک کا اخوت بھرا سلسلہ
زرد مٹی کی دیوار پہ رینگتی یہ سیہ چیونٹیاں
نیلگوں آسماں پہ مہاجر پرندوں کی سب ٹولیاں
اور لاوا اگلتی زمیں پہ بھی خیمہ نشیں ہیں کئی کیکڑے
گویا تمثیل کا اک جہاں پیچ در پیچ کھلتا گیا
میری بے لذتی کسمساتی ہوئی خاک ہونے لگی
ایسے ارژنگ میں میں تو گوشہ نشیں ہو گیا
عرفان شہود
No comments:
Post a Comment