خوب روکا شکایتوں سے مجھے

 خوب روکا شکایتوں سے مجھے

تُو نے مارا عنایتوں سے مجھے

واجب القتل اس نے ٹھہرایا

آیتوں سے، روایتوں سے مجھے

کہتے کیا کیا ہیں دیکھ تو اغیار

یار تیری حمایتوں سے مجھے

وہ صریحاً تو کہہ نہیں سکتے

کہتے ہیں کچھ کنایتوں سے مجھے

کیا غضب ہے کہ دوست تُو سمجھے

دشمنوں کی رعایتوں سے مجھے

دمِ گریہ کمی نہ کر اے چشم

شوق کم ہے کفایتوں سے مجھے

یہ بھی تقدیر کا لکھا کہ لکھیں

خط وہ کن کن کنایتوں سے مجھے

ذکر مہر و وفا کروں تو کہے

نہیں شوق ان حکایتوں سے مجھے

کمئ گریہ نے جلا مارا

ہوا نقصاں کفایتوں سے مجھے

کہہ دو اشکوں سے کیوں ہو کرتے کمی

شوق کم ہے کفایتوں سے مجھے

لے گئی عشق کی ہدایت ذوق

اُس سرے سب نہایتوں سے مجھے​

ابراہیم ذوق