کرونا وہ رقیب جاں طلب ہے

 چلو اے جانِ جاں اب ایسا کرتے ہیں

کرونا وہ رقیبِ جاں طلب ہے

جو بے آواز چل کر

آپ کی سانسوں کے رستے 

روح کی تہہ میں اُترتا ہے

سو اے میرے محبت زاد

میرے ساتھ اٹھنے بیٹھنے اور کھانے پینے 

کام کرنے، بات کرنے کے لیے 

اک ہاتھ کی دوری کو ہم دونوں اگر قائم رکھیں گے 

تو محبت بھی ہمارا ساتھ دے گی

یہ دوری بھی عجب دوری ہے

جو پہلے زمانوں میں بڑی اچھی لگا کرتی تھی 

اس میں بھی محبت کی طرح کی اک کشش ہوتی تھی

ہم اس دوری پہ رہ کر بھی ہمیشہ ساتھ رہتے تھے

مگر وہ دن، وہ دوری اور محبت کا زمانہ اور تھا

یہ اور ہے

اُن دوریوں میں ایک لذت اور محبت اور صداقت تھی

مگر جسموں کی اِن سرگوشیوں میں اب

محبت کی ہوس ہی رہ گئی ہے

نہ جانے ہے بھی یا؟

چلو اے جانِ جاں! ہم اس کرونے کو 

محبت کی صداقت اور عداوت بھی دکھاتے ہیں

چلو، بس اک نظر کے فاصلے پر رہ کے

اب ہم اس رقیبِ جاں طلب کی جان لیتے ہیں

نظر کا فاصلہ میلوں کا ہو کر بھی 

پلک بھر ہی کا ہوتا ہے

سو اے جانِ جہاں! یہ دھیان رکھنا ہے

نہ مجھ کو چُھو کے تجھ تک

اور نہ تجھ کو چُھو کے مجھ تک یہ کرونا آ سکے

ترسے، ہمارا خون پینے کے لیے ترسے

اس قدر ترسے کہ 

میری اور تمہاری دوری کے صحرا میں 

جل بُھن کر یہ مر جائے

ایوب خاور