مجبورئ آدابِ مشیت سے خریدا
کب رختِ جہاں میں نے ضرورت سے خریدا
اٹھ آئے تِری بزم سے ہم تیرے کہے پر
یہ جبر کا سودا تھا، مروت سے خریدا
ہر جسم پہ یوں تنگ ہے یہ جامۂ ہستی
جس نے بھی خریدا ہے شکایت سے خریدا
جاں دے کے تِرے نقش مسخر کیۓ ہم نے
قامت کے تصور کو قیامت سے خریدا
بادل کی طرح ہم بھی گزر جاتے برس کر
آنکھوں کا بھرم اشکِ ندامت سے خریدا
زہر اس نے دیا، گوشۂ لب میں نے بڑھایا
نفرت کا رویہ بھی محبت سے خریدا
وہ بھیڑ تھی بازارِ مسائل میں کہ ساجد
اک لمحۂ فرصت بڑی دقت سے خریدا
ساجد امجد
No comments:
Post a Comment