بجھا بجھا سا چراغ سر مزار ہوں میں

 بجھا بجھا سا چراغ سرِ مزار ہوں میں

خزاں نے جس کو سنوارا ہے وہ بہار ہوں میں

وہ جس پہ غیر بھی روتے ہیں آٹھ آٹھ آنسو

وہ ایک محفل ماضی کی یادگار ہوں میں

جو تیرے دامن رحمت کی آبرو رکھ لے

مِرے کریم وہی اک گناہ گار ہوں میں

نگاہ ہو تو ذرا دیکھ عالم تخریب

اجل کی گود میں قدرت کا شاہکار ہوں میں

ہنسا ہنسا کے رلایا گیا ہوں ساری عمر

ستم ظریفیٔ فطرت کا شاہکار ہوں میں

نہ پوچھ آہ محبت کی زندگی روشن

خزاں کی شکل میں پروردۂ بہار ہوں میں

روشن بنارسی