پسِ دیوار تلاطم ہے دھواں اٹھتا ہے
ایسا لگتا ہے مِرا شاہِ زماں اٹھتا ہے
عشق کا روگ کترتا ہے مِری رگ رگ کو
درد رہ رہ کے فقط دل میں کہاں اٹھتا ہے
دو گھڑی بیٹھ کہ اس وحشت و عجلت سے تری
در و دیوار لرزتے ہیں مکاں اٹھتا ہے
شِکمِ زیست سے ہے مرگ تلک تنہائی
سو مجھے غم نہیں تو مجھ میں کہاں اٹھتا ہے
دمِ ہستی سے گزرتے ہیں گزرنے والے
ہم بھی بیٹھے ہیں کہ کب روحِ رواں اٹھتا ہے
ردا خاموشی سے ان لوگوں کو ڈھانپے رکھو
کیا خبر، کون نہاں، کون عیاں اٹھتا ہے
ردا زینب شاہ
No comments:
Post a Comment