اس سے بڑھ کر کہوں میں کیا مرشد

اِس سے بڑھ کر کہوں میں کیا مُرشد
 میرے حق میں بھی کر دُعا مُرشد
 مجھ سے مِٹتے ہوئے نظارے کو
 کچھ نہ کچھ تو مِلے بقا مُرشد
 میں نے جو عشق کر کے چھوڑا تھا
 دے رہا ہے مجھے سزا مُرشد
مجھ کو دل میں ہی رکھ محبت سے
 اپنی نظروں سے مت گِرا مُرشد
 میں کہ افلاک کا ستارہ تھا
 آج مٹی میں مِل گیا مُرشد
 دُھوپ میں رکھ کے یوں جلایا گیا
 بن گیا دن کا میں دِیا مُرشد
 تُو ہی بتلا کہ اِس زمانے میں
 کوئی ہم سا ہے بے نوا مُرشد
 تجھ کو مانا ہے جانِ جاں لیکن
 ہم نے مانا نہیں خدا مُرشد
 جب سے اشرفؔ کو رہنما مانا
 تب سے رہنے لگا خفا مُرشد

 اشرف نقوی