دیارِ دل میں ترے غم کی آبرو کیا ہے

دیارِ دل میں تِرے غم کی آبرو کیا ہے
کبھی تو دیکھ مِری آنکھ سے کہ تُو کیا ہے
میں کیا کروں گا یہ دنیائے رنگ و بو لے کر
تِرے بغیر یہ دنیائے رنگ و بو کیا ہے
جگر کے داغ سے فارغ ہوئے نہ ہاتھ مِرے
وگرنہ ایک گریبان کا رفُو کیا ہے
کبھی تو آخرِ شب کی خموشیوں میں سنو
گل و ستارہ و شبنم کی گفتگو کیا ہے
جسے بھی آئیں میسّر وہ چشم و عارض و لب
اسے یہ بادہ و پیمانہ و سبُو کیا ہے
اڑی ہے پھر کہیں کیا میکدوں کے کھلنے کی
ہجومِ تشنہ لباں میں یہ ہاؤ ہو کیا ہے
ادائے حُسن کا مارا ہوا ہماری طرح
قتیلِ غمزۂ معشوق ہے،عدو کیا ہے
اسی لیے تِرے درباں سے دور بیٹھے ہیں
کہ پوچھ لے، تو کہیں کیا کہ جستجو کیا ہے
حدیثِ یار کو خاورؔ لہو سے لکھتے ہیں
یہاں بھی کام نہ آیا تو پھر لہو کیا ہے

خاور احمد