قدم قدم پہ دیا ایک امتحاں میں نے

قدم قدم پہ دِیا ایک امتحاں میں نے

گزار دی ہے مگر عمر رائیگاں میں نے

یہ اور بات کہ آنکھوں نے کہہ دیا سب کچھ

ترے حضور میں کھولی نہیں زباں میں نے

رہا یہ خوف کہ ناکام ہو نہ جائیں کہیں

جبھی لیا نہیں یاروں کا امتحاں میں نے

میں آئینے میں ترا عکس ڈھونڈ سکتا تھا

یقیں کے سامنے رکھا نہیں گماں میں نے

یہ گردِ راہ نہیں، دوستو! ستارے ہیں

اٹھا رکھی ہے کوئی سر پہ کہکشاں میں نے

وہی ہے راستہ، منزل بھی ہے وہی میری

تو کس گمان میں بدلا ہے کارواں میں نے

ابھی سے برہمی آنے لگی ہواؤں میں

ابھی تو کھولے ہیں کشتی کے بادباں میں نے

’’مری تو نیند، مِرا خواب ٹُوٹنے سے کُھلی‘‘

سنی نہیں کوئی آواز ناگہاں میں نے

فصیحؔ وہ مِرا ہمدرد بھی نہیں ہے، تو پھر

اُسے سُنائی ہے کیوں اپنی داستاں میں نے

وطن کے خار ہیں میری نظر میں پُھول فصیحؔ

دیارِ غیر کی جَھیلی ہیں سختیاں میں نے

شاہین فصیح ربانی