جب وہ پشیمان نظر آئے ہیں

جب وہ پشیمان نظر آئے ہیں
موت کے سامان نظر آئے ہیں
ہو نہ ہو، آ گئی منزل قریب
راستے سُنسان نظر آئے ہیں
عشق میں سہمے ہوئے دو آشنا
مدتوں انجان نظر آئے ہیں
کھا نہ سکے زندگی بھر جو فریب
ایسے بھی نادان نظر آئے ہیں
عشق میں کچھ ہم ہی پریشاں نہیں
وہ بھی پریشان نظر آئے ہیں
ہوش جب آیا ترے جانے کے بعد
گھر میں بیابان نظر آئے ہیں
کی ہے جو فکر اپنے گریباں کی
لاکھ گریبان نظر آئے ہیں
عشق ہے فرسودہ حکایت، مگر
نِت نئے عنوان نظر آئے ہیں
ہائے رے وہ مدھ بھری آنکھیں خمارؔ
مئے کدے ویران نظر آئے ہیں

خمار بارہ بنکوی