روشنی حلقۂ زنجیر پہ آ بیٹھی ہے

روشنی حلقۂ زنجیر پہ آ بیٹھی ہے
زندگی درد کی جاگیر پہ آ بیٹھی ہے
خواب ٹُوٹے ہیں تو آوارگئ دل کو لئے
میری حسرت تیری تصویر پہ آ بیٹھی ہے
رفتہ رفتہ ہوئے سب دل کے جھروکے مسمار
خستگی حسرتِ تعمیر پہ  آ بیٹھی ہے
ایک تصویر نہاں خانۂ دل میں تھی بسی
صورتِ نقش وہ تحریر پہ  آ بیٹھی ہے
ظلم کو دیکھنا مل جائے گا پھر ایک جواز
اب ہوس شانۂ تقدیر پہ آ بیٹھی ہے
         زر کی تہذیب کے پروردہ قصیدہ خوانو     
زرگری مسندِ توقیر پہ آ بیٹھی ہے
رگِ بے شِیر میں تھی شعلہ کناں جو پہلے
تشنگی ہو کے خجل تیر پہ آ بیٹھی ہے
دیکھ کر جُبّہ و دستار کو ہوتا ہے گماں
بندگی زینۂ تشہیر پہ  آ بیٹھی ہے
فاختہ دیکھ کے بدلی ہوئی رُت کے تیور
شاخِ زیتون سے انجیر پہ  آ بیٹھی ہے
چاہئے عِلم، کہیں اور کنارہ کر لے
اب جہالت فنِ تقریر پہ آ بیٹھی ہے
طوق و زنجیر سے، زندان سے پا کر اعزاز
عاشقی دار کی تعزیر پہ  آ بیٹھی ہے
لوحِ محفوظ پہ تحریر کہانی اپنی
آیتِ زیست کی تفسیر پہ  آ بیٹھی ہے
دیکھتے دیکھتے تجھ کو میرے خوابِ ہستی
چشمِ حیراں تیری تعبیر پہ  آ بیٹھی ہے
ڈوبتے ڈوبتے ساحل کا نظارہ کر لوں
زندگی آخری تدبیر پہ  آ بیٹھی ہے
اب مِرے  لفظ بھی بن جائیں گے اسمِ اعظم
اب دعا عرشۂ تطہیر پہ  آ بیٹھی ہے
اپ تو چمکے گا بلندی پہ ستارہ اپنا
خوش نصیبی درِ شبیرؓ پہ  آ بیٹھی ہے
سب دعاگو ہیں  تبسمؔ کہ خدا خیر کرے
تیرگی جادۂ  تنویر پہ  آ بیٹھی ہے  

 تبسم نواز