جنوں کا ایسا طریقہ بنے تو بات بنے

جنوں کا ایسا طریقہ بنے تو بات بنے
کہ تیرے ساتھ ہی قصہ بنے تو بات بنے
وہ شہر بھر کو فسانے سُناتا پِھرتا ہے
ہمارے سامنے سچا بنے تو بات بنے
تمہارے چاک پہ پُتلے خطا کے بنتے ہیں
تمہارے چاک پہ بندہ بنے تو بات بنے
رہو تو دِل میں رہو شہر میں کہیں نہ رہو
تمہارے ساتھ یہ رشتہ بنے تو بات بنے
میں خود کو مان لوں پرتَو کسی حقیقت کا
نہ عکس شیشے میں اُلٹا بنے تو بات بنے
گزر رہے ہیں جہاں سے ہم آج پہلی بار
ہمارے بعد یہ رَستہ بنے تو بات بنے
اُسے نکال کے لاؤ حجاب سے باہر
تماشبین، تماشا بنے تو بات بنے

ادریس آزاد