مستقل اس میں ٹھکانہ بھی نہیں چاہتے ہم

مستقل اِس میں ٹھکانہ بھی نہیں چاہتے ہم 

اور اِس دشت سے جانا بھی نہیں چاہتے ہم

دیکھ سکتے ہیں کہ دیوار کے پیچھے کیا ہے 

بات ایسی ہے، بتانا بھی نہیں چاہتے ہم

چاہتے ہیں کہ خریدار بھی دوڑے آئیں 

اور آواز لگانا بھی نہیں چاہتے ہم

جانے والوں کو اجازت بھی نہیں دے سکتے 

اِن چراغوں کو بجھانا بھی نہیں چاہتے ہم

روز آ جاتے ہیں تنہائی سے سر پھوڑنے کو 

اور یہ دیوار گرانا بھی نہیں چاہتے ہم

ذکر بھی کرتے پھرے ہیں ترا گلیوں گلیوں 

روز اِک تازہ فسانہ بھی نہیں چاہتے ہم

نیند بھی لے نہیں سکتے ہیں سکوں سے عامیؔ

خواب کے شہر سے جانا بھی نہیں چاہتے ہم

عمران عامی