انساں نہیں رہتا ہے تو ہوتا نہیں غم بھی​

انساں نہیں رہتا ہے تو ہوتا نہیں غم بھی​
سو جائیں گے اک روز زمیں اوڑھ کے ہم بھی​
بے جا نہیں کہہ دوں جو اسے لطف و کرم بھی​
قسمت میں مِری اتنے کہاں تھے تِرے غم بھی​
جس لغزش آدمؑ سے خلافت ہے مزین​
اس جوشِ محبت کے خطاوار ہیں ہم بھی​
اہلوں کے مقامات پہ نا اہل ہیں فائز​
گھٹتا ہے اب اس شہر تمدن میں تو دَم بھی​
آ جائے میسر جو کوئی ڈھب کا خریدار​
ہم لوگ تو بِک جاتے ہیں بے دام و درم بھی​
"​یہ بات غلط شہر میں "تم سے ہیں ہزاروں
اے جانِ طرب! آج تو نایاب ہیں ہم بھی​
پہلے تو اعزاء مِرے رونے پہ ہنسے ہیں​
دنیا پہ گزرتا ہے گِراں اب تِرا غم بھی​
انسان کی کیا بات ہے، پتھر کی سِلوں پر​
محفوظ ابھی تک ہیں کئی نقشِ قدم بھی​
لازم ہے کہ شایان تجلی ہوں نگاہیں​
ہونے کو تو یوں طالبِ دیدار ہیں ہم بھی​
اس شہر میں چلتی نہیں اخلاق کی راہیں​
اس دور میں ناپید ہیں اربابِ ہمم بھی​
ڈر ہے کہیں اس کو بھی نہ اپنا لے زمانہ​
محدود ابھی تو ہے ہمیں تک تِرا غم بھی​
حیرت ہے کہ رکتے ہیں جہاں زیست کے رہرو​
کہتے ہیں اسی قریۂ ہستی کو عدم بھی​
شام آئی، سمندر میں چلا ڈوبنے سورج​
اک روز تِرے دل سے اتر جائیں گے ہم بھی​
دیوانے اگر جھانجھ میں کہہ دیں گے کوئی بات​
رہ جائیں گے منہ دیکھ کے قرطاس و قلم بھی​
تُو نے کبھی اس راز کو سوچا ہے نہ سمجھا​
ہیں تیرے تعاقب میں تِرے نقش قدم بھی​
ہر چند کہ شکوہ ہے غمِ ہِجر کا، لیکن​
جینے میں معاون ہے تِرے ہِجر کا غم بھی​
تاریک شبوں میں بھی کئی غار تھے روشن​
اے کاش وہ خوش کام سماں دیکھتے ہم بھی​
میں مسند و اورنگ سے غافل تو نہیں ہوں​
ہے میری نظر میں تِرا معیار کرم بھی​
لبریز کیا ہے تو سنبھالو ہمیں، ورنہ​
شیشے کی طرح گِر کے بِکھر جائیں گے ہم بھی​
تشخیصِ مرض چارہ گرو! سوچ سمجھ کر
ہوتا ہے مجھے درد کی تخفیف کا غم بھی​
تم لوگ زباں دے کے بھی پِھر جاتے ہو اکثر​
ہم لوگ نبھا دیتے ہیں بے قول و قسم بھی​
کل رات سے سینہ میں وہی پہلی خلِش ہے​
اب ہاتھ سے جاتا نظر آتا ہے بھرم بھی​
جو سینہ سِپر عرصۂ ہستی میں ہیں دانشؔ​
دشوار نہیں ان کے لیے راہِ عدم بھی​

احسان دانش