اس کی حسرت ہے جسے دل سے مٹا بھی نہ سکوں

اس کی حسرت ہے جسے دل سے مٹا بھی نہ سکوں
ڈھونڈنے اس کو چلا ہوں جسے پا بھی نہ سکوں
ڈال کر خاک میرے خون پہ قاتل نے کہا
کچھ یہ مہندی نہیں میری کے مٹا بھی نہ سکوں
ضبط کمبخت نے اور آ کے گلا گھونٹا ہے
کہ اسے حال سناؤ تو سنا بھی نہ سکوں
اس کے پہلو میں جو لے جا کے سلا دوں دل کو
نیند ایسی اسے آئے کے جگا بھی نہ سکوں
مہرباں ہو کے بلا لو مجھے چاہو جس وقت
میں گیا وقت نہیں ہوں کہ پھر آ بھی نہ سکوں
ضعف میں طعنۂ اغیار کا شکوہ کیا ہے
بات کچھ سر تو نہیں ہے کہ اٹھا بھی نہ سکوں
زہر ملتا ہی نہیں مجھ کو ستم گر، ورنہ
"کیا قسم ہے تیرے ملنے کی کہ کھا بھی نہ سکوں"
نقش پا دیکھ لوں لاکھ کروں گا سجدے
سر میرا عرش نہیں ہے کہ جھکا بھی نہ سکوں
بے وفا لکھتے ہیں وہ اپنی قلم سے مجھ کو
یہ وہ قسمت کا لکھا ہے جو مٹا بھی نہ سکوں
اس طرح سوئے ہیں سر رکھ کے میرے زانوں پر
اپنی سوئی ہوئی قسمت کو جگا بھی نہ سکوں

امیر مینائی