کچھ خانماں برباد تو سائے میں کھڑے ہیں

کچھ خانماں برباد تو سائے میں کھڑے ہیں
اس دَور کے انساں سے تو یہ پیڑ بھَلے ہیں
چیونٹی کی طرح رینگتے لمحوں کو نہ دیکھو
اے ہم سفرو! رات ہے، اور کوس کڑے ہیں
پتھر ہیں تو رستے سے ہٹا کیوں نہیں دیتے
رہرو ہیں تو کیوں صورتِ دیوار کھڑے ہیں
میں، ہیچ سخن، ہیچ مداں، ہیچ عبارت
کہتا ہوں تو کہتے ہیں کہ الفاظ بڑے ہیں
تاریخ بتائے گی کہ ہم اہلِ قلم ہی
آزادئ انساں کے لیے جنگ لڑے ہیں

رسا چغتائی​