صحن حرم و کوئے صنم چھوڑ دیا ہے

صحن حرم و کوئے صنم چھوڑ دیا ہے

ہر در کو تِرے در کی قسم چھوڑ دیا ہے

سلجھے ہیں نہ سلجھیں گے کبھی گیسوئے جاناں

کچھ ایسا تِری زلفوں نے خم چھوڑ دیا ہے

کر لیجیے توبہ کا یقیں حضرتِ واعظ

میخانے کو ساقی کی قسم چھوڑ دیا ہے

غفلت مری جانب سے ہے یا ان کی طرف سے

یہ فیصلہ تجھ پر شبِ غم چھوڑ دیا ہے

ظالم! تجھے یہ راز بتانا ہی پڑے گا

کیوں مشغلۂ مشقِ ستم چھوڑ دیا ہے

اس دور کا ہر شاعرِ نازک ہے سپاہی

تلوار اٹھا لی ہے قلم چھوڑ دیا ہے 

فنا نظامی کانپوری