میرے رونے پر کسی کے چشم گریاں ہائے ہائے

میرے رونے پر کسی کے چشمِ گریاں ہائے ہائے

وہ گُلِ تر وہ فضائے شبنمستاں ہائے ہائے

وہ کسی کی یادِ پیہم شامِ ہجراں ہائے ہائے

ہر نفس وقفِ نوا ہائے پریشاں ہائے ہائے

دل پہ دردِ عشق کا اک ایک احساں ہائے ہائے

جان کی صورت میں کوئی دشمنِ جاں ہائے ہائے

صبحِ ہجراں بدتر از شبہائے ہجراں ہائے ہائے

زندگی اک مستقل خوابِ پریشاں ہائے ہائے

دل کی راحت کے لیے ان کی محبت کے لیے

کوششِ بے سُود پھرتا حد امکاں ہائے ہائے

میری خاطر، اور وہ مجبوریوں کا اعتراف

انکے نازک دل کو بھی احساسِ ہجراں ہائے ہائے

کیفیاتِ سجدۂ ذوقِ محبت، الاماں

کعبۂ دل بے نیازِِ کفر و ایماں ہائے ہائے

وہ مِرا کیفِ نظر، وہ بیخودی، وہ سرخوشی

فرصتِ نظارہ ہائے حسنِ جاناں، ہائے ہائے

انکی محفل میں بھی ہوں دامن کشِ وحشت بہ دل

ہر جگہ اک عالمِ آدابِ زنداں، ہائے ہائے

یاس کی موجوں میں ہر منظر کا آخر ڈوبنا

دل سے وہ اٹھتا ہوا طوفانِ حرماں، ہائے ہائے

جو نہ سمجھیں درد کیا ہے، درد کا احساس کیا

کب تک انکے واسطے باسط غزل خواں ہائے ہائے

باسط بھوپالی