میں ضعف سے جوں نقشِ قدم اٹھ نہیں سکتا​

میں ضعف سے جوں نقشِ قدم اٹھ نہیں سکتا​

بیٹھا ہوں سرِ خاک پہ جم، اٹھ نہیں سکتا​

اے اشکِ رواں! ساتھ لے اب آہِ جگر کو​

عاشق کہیں بے فوج و علم اٹھ نہیں سکتا​

سر معرکۂ عشق میں آساں نہیں دینا​

گاڑے ہے جہاں شمع قدم، اٹھ نہیں سکتا​

دل پر ہے مِرے خیمۂ ہر آبلہ استاد​

کیا کیجے کہ یہ لشکرِ غم اٹھ نہیں سکتا​

رو رو کے لکھا خط جو اسے میں نے تو بولا​

اک حرف سرِ کاغذِ نم اٹھ نہیں سکتا​

ہر دم لبِ فوارہ سے جاری یہ سخن ہے​

پانی نہ ذرا جس میں ہو دم اٹھ نہیں سکتا​

میں اٹھ کے کدھر جاؤں، ٹھکانا نہیں کوئی​

میرا تِرے کوچے سے قدم اٹھ نہیں سکتا​

مہندی تو سراسر نہیں پاؤں میں لگی ہے​

تُو بہرِ عیادت جو صنم اٹھ نہیں سکتا​

بیمار تِرا صورتِ تصویرِ نہالی​

بستر سے تِرے سر کی قسم، اٹھ نہیں سکتا​

جوں غنچہ نصیر اس بتِ گل رو کی جو ہے یاد​

یاں سر ہو گریباں سے بہم، اٹھ نہیں سکتا​

شاہ نصیر دہلوی​