کسی کے نقشِ قدم کا نشاں نہیں ملتا
وہ رہگزر ہوں جسے کارواں نہیں ملتا
قدم قدم پہ تِری راہ میں فلک حائل
مجھے تلاش سے بھی آسماں نہیں ملتا
انہیں طریقۂ لطف و کرم نہیں معلوم
تجھے یہ غم کہ خوشی کو تِری ثبات نہیں
مجھے گِلہ کہ غمِ جاوداں نہیں ملتا
دھڑک رہا ہے ہر اہلِ وفا کے سینے میں
ہمارا درد بھرا دل کہاں نہیں ملتا
سبھی کو دعوائے مہر و وفا ہے دنیا میں
جو مہرباں نہ ہو، وہ مہرباں نہیں ملتا
غمِ حیات کے پُر ہول قہقہوں کے سوا
کہیں سے اپنا جوابِ فغاں نہیں ملتا
دلِ شکستہ کو لے جائیے کہاں باسط
دماغِ نخوتِ شیشہ گراں نہیں ملتا
باسط بھوپالی
No comments:
Post a Comment