کچھ اشارے وہ سر بزم جو کر جاتے ہیں

کچھ اشارے وہ سرِ بزم جو کر جاتے ہیں

ناوکِ ناز کلیجے میں اتر جاتے ہیں

اہلِ دل راہِ عدم سے بھی گزر جاتے ہیں

نام لیوا تِرے بے خوف و خطر جاتے ہیں

سفرِ زیست ہوا ختم نہ سوچا، لیکن

ہم کو جانا ہے کہاں اور کدھر جاتے ہیں

نِگہِ لطف میں ہے عقدہ کشائی مضمر

کام بگڑے ہوۓ بندوں کے سنور جاتے ہیں

خوب بدنام کِیا اپنی سیہ کاری نے

انگلیاں اٹھتی ہیں محشر میں جدھر جاتے ہیں

آنکھ کھل جاتی ہے چونک اٹھتے ہیں سونے والے

وہ دبے پاؤں جو تُربت سے گزر جاتے ہیں

کشتۂ ناز تِرا کیوں نہ زمیں پر لوٹے

داغِ دل جتنے ہیں اس طرح وہ بھر جاتے ہیں

ناز دہلوی 

شیر سنگھ