ذرا ٹھہرو مری حالت سنبھل جائے تو پھر جانا

 ذرا ٹھہرو مری حالت سنبھل جائے تو پھر جانا

دل بے تاب تھوڑا سا بہل جائے تو پھر جانا

ابھی تو فرقتوں کے سحر سے نکلا نہیں ہوں میں

تمہارے وصل کا جادو یہ چل جائے تو پھر جانا

جمی ہیں دھڑکنیں تو منجمد ہیں میری سانسیں بھی

بدن میں زندگی تھوڑی مچل جائے تو پھر جانا

ابھی جاؤ نہ تم, جکڑا ہوا ہے درد نے مجھ کو

تمہارے درد کا لوہا پگھل جائے تو پھر جانا

تمہارے وصل سے جینے کی خواہش پھر سے جنمی ہے

یہ ننھی سی تمنا پھول پھل جائے تو پھر جانا

ندیم اصغر