اے پیکر جمال توئی سید بشر

 عارفانہ کلام حمد نعت منقبت

اے پیکرِ جمال توئی سیدِ بشرﷺ

اے شاہِ خوش خصال توئی سیدِ بشرﷺ

نورِ قدیم نے ہی رکھی تیرے نور میں

ہر خوبئ کمال، توئی سیدِ بشرﷺ

ہر دور میں رہی ہیں یہ پاکیزگی پسند

جد تیری، تیری آل، توئی سیدِ بشرﷺ

چِھڑتا ہے جب بھی ذکرِ جمالِ شہنشہاں

آتا ہے اک خیال، توئی سیدِ بشرﷺ

گرچہ ہر اک عروج کو ہوتا زوال ہے

تجھ کو نہیں زوال، توئی سیدِ بشرﷺ

ماضی بھی اور عرصۂ فردا بھی ہے تِرا

قرباں ہے تجھ پہ حال، توئی سیدِ بشرﷺ

ہے کون اوجِ حضرتِ انسان؟ تھا جواب

جب مجھ سے تھا سوال، توئی سیدِ بشرﷺ

کردارِ نور اے شہِ کون و مکاںﷺ تِرا

اس بات پر ہے دال، توئی سیدِ بشرﷺ

ازہر سا بے ہنر تِرے اوصاف کیا لکھے

اے عکسِ ذوالجلال ،توئی سیدِ بشرﷺ

اویس ازہر مدنی