ہاتھ میں کاسہ کلائی میں کڑا سجتا ہے

ہاتھ میں کاسہ، کلائی میں کڑا سجتا ہے
 دَر بڑا ہو تو سوالی بھی کھڑا سجتا ہے
 میں تِرے کنجِ تغافل سے نکلتی کیسے
 میرا ساماں اِسی کونے میں پڑا سجتا ہے
دل پہ سامانِ زمانہ کبھی رکّھا ہی نہیں
 اس گھڑونجی پہ محبت کا گھڑا سجتا ہے
یہ الگ بات ، وہ دیوار میں خود ہوں لیکن
 عشق دیوار گِرانے پہ اَڑا سجتا ہے
 یہ صفِ دلزدگاں ہے تجھے احساس رہے
 تو یہاں صرف مِرے ساتھ کھڑا سجتا ہے
 سَر کیے جاؤں تِرا کوہِ رفاقت یوں ہی
 میرا جھنڈا اِسی چوٹی پہ گڑا سجتا ہے
 طاقِ محرابِ وفا میں ہے ٹھکانہ میرا
 جو دِیا بُجھ نہ سکے اِس میں بڑا سجتا ہے
 قیمت و قدر بڑھاتے ہیں یہ رشتے ناطے
 لعل دستار یا زیور میں جَڑا سجتا ہے 

حمیدہ شاہین