راہ دشوار کی جو دھول نہیں ہو سکتے

راہِ دشوار کی جو دھول نہیں ہو سکتے
ان کے ہاتھوں میں کبھی پھول نہیں ہو سکتے
تیرے معیار پہ پورے نہ اترنے والے
منصبِ عشق سے معزول نہیں ہو سکتے
اتنا خوں ہے مِرا گلشن میں، کہ اب میرے خلاف
پیڑ ہو جائیں، مگر پھول نہیں ہو سکتے
حاکمِ شہر کے اطراف وہ پہرہ ہے کہ اب
شہر کے دکھ اسے موصول نہیں ہو سکتے
فیصلے جن سے ہو وابستہ وطن کی قسمت
صرف اندازوں پہ معمول نہیں ہو سکتے
خون پینے کو یہاں کوئی بلا آتی ہے
قتل تو روز کا معمول نہیں ہو سکتے
جنبشِ ابروئے شاہاں نہ سمجھنے والے
کسی دربار میں مقبول نہیں ہو سکتے

پروین شاکر