لطف لیتا ہے مگر شکوہ سرا ہوتا ہے

لُطف لیتا ہے مگر شکوہ سرا ہوتا ہے

 شوق، احسان فراموشِ جفا ہوتا ہے

 اتنے بے درد نہیں وہ کہ تسلّی بھی نہ دیں 

 ٹھیس لگنے سے مگر زخم ہرّا ہوتا ہے

اے سکوتِ در و دیوار! تُو شاہد رہنا

شامِ غم سے مِرا پیمانِ وفا ہوتا ہے

عالمِ شوق یونہی گوش بر آواز نہیں

بربطِ دل پہ کوئی نغمہ سرا ہوتا ہے

یہ ستارے، یہ مہ و مہر کریں لاکھ جتن

جلوۂ دوست کا انداز جُدا ہوتا ہے

درِ جاناں نہ سہی سایۂ خنجر ہی سہی

سجدۂ شوق بہرحال ادا ہوتا ہے

شوق ہو راہنما تو کوئی مشکل نہ رہے

شوق مشکل سے مگر راہنما ہوتا ہے

ایک دل تاب تجلّی کو ترستی ہے نظر

صبح ہوتی ہے مگر صبح سے  کیا ہوتا ہے

رُخصتِ دوست پہ قابلؔ دلِ مایوس کو دیکھ

اِک سفینہ ہے کہ ساحل سے جُدا ہوتا ہے

قابل اجمیری