دل جل رہا ہے چھاؤں میں دیوارِ یار کی

دل جل رہا ہے چھاؤں میں دیوارِ یار کی 

 تصویر کھینچ لو ستمِ روزگار کی 

 یارو! امید و توبہ و ساغرکا ذِکر کیا 

 اب کے تو دل بھی توڑ گئی رُت بہار کی 

کیوں بُجھ گئے چراغ ستاروں کو کیا ہُوا 

 رات اتنی مُختصر تو نہ تھی انتظار کی 

 ہم بھی دلِ خراب سے بیزار ہیں مگر 

 کیا کیجئے کہ بات نہیں اختیار کی 

 دل بھی ہے چاک چاک جگر بھی ہے داغ داغ 

 لائی تھی شہرِ گُل میں تَمنّا بہار کی 

 مُڑ مُڑ کے دیکھتے ہیں شبِ غم کے راہرو 

 آنکھوں میں روشنی ہے ابھی انتظار کی 

 دل اِنتہا پسند، خِرَد حوصلہ شِکن 

 دیوانے کس سے بات کریں بزمِ یار کی 

 قابلؔ لُٹا کےخونِ تمنّا کی سُرخیاں 

 ہم نے چمن سے قید اُٹھا دی بہار کی 

قابل اجمیری