کچھ اس طرح سے عبادت خفا ہوئی ہم سے

کچھ اس طرح سے عبادت خفا ہوئی ہم سے

نمازِ عشق بہت کم ادا ہوئی ہم سے

غریب آنکھوں میں آنسو بھی اب نہیں آتے

الٰہی رحم کہ پھر کیا خطا ہوئی ہم سے

ہم ابتدا ہی کہاں نیکیوں کی تھے یا رب

تو پھر گناہوں کی کیوں انتہا ہوئی ہم سے

یہ بدنصیبی ہماری ہے، کم ہوا ایسا

کہ دشمنوں کے بھی حق میں دعا ہوئی ہم سے 

سلوک موت کا ہم سے نہ جانے کیسا ہو

یہ زندگی تو بہت بے مزہ ہوئی ہم سے

کہاں چھپائیں گے محشر میں خود کو ہم آزر

کہاں اطاعتِ خیرالوریٰ ہوئی ہم سے

فریاد آزر