ہم تنگ نائے ہجر سے باہر نہیں گئے

ہم تنگ نائے ہجر سے باہر نہیں گئے
تجھ سے بچھڑ کے زندہ رہے، مر نہیں گئے
آج اپنے گھر میں قید ہیں، ان سے حجاب ہے
جو گھر سے بے نیاز ہوئے، گھر نہیں گئے
اپنے لہو میں جاگ رہی تھی نمُو کی آگ
آنکھوں سے اس بہار کے منظر نہیں گئے
اس پر نہ اپنے درد کی بے قامتی کھُلے
ہم اس دراز قد کے برابر نہیں گئے
ساقیؔ اس ایک رات کی بے حرمتی کے بعد
اچھا ہوا کہ سُوئے ستمگر نہیں گئے

ساقی فاروقی