اگر غفلت سے باز آیا جفا کی​

اگر غفلت سے باز آیا جفا کی​

تلافی کی بھی ظالم نے تو کیا کی​

موئے آغازِ الفت میں ہم افسوس

اسے بھی رہ گئی حسرت جفا کی

کبھی انصاف ہی دیکھا نہ دیدار​

قیامت اکثر اس کُو میں رہا کی​

فلک کے ہاتھ سے میں جا چھپوں گر​

خبر لا دے کوئی تحت الثریٰ کی​

شبِ وصل عدو کیا کیا جلا ہوں

حقیقت کھل گئی روزِ جزا کی

چمن میں کوئی اس کُو سے نہ آیا​

گئی برباد سب محنت صبا کی​

کشادِ دل پہ باندھی ہے کمر آج

نہیں خیر آپ کے بندِ قبا کی

کِیا جب التفات اس نے ذرا سا​

پڑی ہم کو حصولِ مدعا کی​

کہا ہے غیر نے تم سے مِرا حال​

کہے دیتی ہے بے باکی ادا کی​

تمہیں شورو فغاں سے میرے کیا کام​

خبر لو اپنی چشمِ سرمہ سا کی​

دیا علم و ہنر حسرت کشی کو​

فلک نے مجھ سے یہ کیسی دغا کی​

غمِ مقصد رسی تا نزع اور ہم​

اب آئی موت بختِ نارسا کی​

مجھے اے دل تِری جلدی نے مارا​

نہیں تقصیر اس دیر آشنا کی​

جفا سے تھک گئے تو بھی نہ پوچھا​

کہ تُو نے کس توقع پر وفا کی​

کہا اس شوخ سے مرتا ہوں تو مومنؔ

کہا میں کیا کروں، مرضی خدا کی

مومن خان مومن