اک تو وہ ہم سے بدگمان بھی ہے

اِک تو وہ ہم سے بدگمان بھی ہے

 پھر، نیا سامنے جہان بھی ہے  

زندگی کا یہ سلسلہ ہی نہیں

 دل، محبت کا ترجمان بھی ہے

 زخم چہرے پہ انگنت ہیں، مگر

 آئینے میں کوئی نشان بھی ہے

 جس جگہ کو مٹا رہا ہے فلک

 اُس گلی میں مرا مکان بھی ہے

موت کی یہ سزا بڑی تو نہیں

 اِس کے پیچھے ترا بیان بھی ہے

 صرف پیروں تلے زمیں ہی نہیں

 دسترس میں تو آسمان بھی ہے

 عشق لمحوں کا واقعہ ہی نہیں

 عشق صدیوں کی داستان بھی ہے

 دل تو اُس کے نہیں ہے پاس بتولؔ

 ہائے اُس شخص کی زبان بھی ہے

 فاخرہ بتول