مجھے تم سے محبت تھی

مجھے تم سے محبت تھی

اگرچہ پیار لفظوں کے ترازو میں نہیں تولا

کبھی یہ سچ نہیں بولا

مگر تم سے محبت تھی

اسی دن سے

کہ جب سے زندگی درّانہ آئی تھی

مگر یہ پیار کا جذبہ

بھلا اظہار کا دست نگر کب تھا

تمہارے پیار کی موجیں

مِرے دل کے سمندر پر ہمیشہ سے ہی رقصاں تھیں

ہر اک شے میں تمہارے حُسن کا چہرہ مزیّن تھا

تمہی کو گیت کے قالب میں اب تک ڈھالتا آیا

تمہارا پیار دل میں اب تلک میں پالتا آیا

مجھے جب بھی تمنّاؤں کے صحرا میں

بھٹکتے، کھوجتے اِک آشنا چہرہ نظر آیا

تمہارا تھا

اسے میں نے محبت کے نہاں خانوں میں رکھ چھوڑا

اسے میں نے تمہارے اَن سُنے سے نام سے منسُوب کر ڈالا

کبھی جو زندگی کی بِھیڑ میں

انجان رَستوں میں

کسی چہرے کی نرمی نے

کسی آواز کی لَے نے

مجھے اپنی طرف کِھینچا

تمہارا عکس تھا شاید

تمہاری ذات کا پَرتَو

مِری اطراف میں یوں ضوفشاں تھا

جس طرح مہتاب کی کرنیں

کسی فُرقت زدہ دل میں

شہابی رنگ کے کتنے اُجالے گھول دیتی ہیں

اب ان رنگوں کو بہنے دو

مجھے اب تو یہ کہنے دو

مجھے تم سے محبت ہے

سلمان باسط