جب زندگی کے غم نہ کسی طور کم ہوئے

جب زندگی کے غم نہ کسی طور کم ہوئے

آخر حریفِ گردشِ ایام ہم ہوئے

ہونے کو انقلاب یہاں دم بدم ہوئے

دل کے سے حادثات بھی دنیا میں کم ہوئے

دل مِٹ گیا تو سارا زمانہ ہے دل نواز

غم مِٹ گیا تو آپ بھی پُرسانِ غم ہوئے

ہم کو بھی کیا بری تھی گلستاں کی زندگی

کچھ تو سمجھ لیا تھا کہ برباد ہم ہوئے

احساسِ ارتباطِ محبت تو دیکھئے

زُلفیں کھُلیں کسی کی پریشان ہم ہوئے

میرا جنونِ عشق بھی کچھ خام کار تھا

کچھ آپ کی نظر کے اشارے بھی کم ہوئے

ان کی نظر کا اس میں قمرؔ کیا قصور ہے

ہم نے وفائیں کی تھیں، پشیمان ہم ہوئے

قمر مرادآبادی