محبت میں حریف دل شکن بھی کام آتا ہے

محبت میں حریفِ دل شکن بھی کام آتا ہے

وفا کی منزلوں میں راہزن بھی کام آتا ہے

یہ بزمِ زندگی ہے، ساز و مطرب سے نہیں سجتی

یہاں ہنگامۂ دار و رسن بھی کام آتا ہے 

بڑی عظمت ہے رندانِ سُبوکش کی مگر ساقی

کبھی اک رِندِ پیمانہ شکن بھی کام آتا ہے 

دلِ بیگانہ خُو سے بدگماں رہنا بھی ہے بہتر

کسی منزل میں لیکن حسنِ ظن بھی کام آتا ہے

یہ دیکھا ہے کہ پیمانِ وفا کی اُستواری میں

صداقت ہو تو ظرفِ برہمن بھی کام آتا ہے

یہ ناقوس و اذاں جب سوزِ دل پیدا نہیں کرتے

ہجومِ غم میں سازِ انجمن بھی کام آتا ہے

قمرؔ بے کیف ہو جاتی ہے جب محفل خموشی میں

تو اکثر میرا اندازِ سخن بھی کام آتا ہے

قمر مرادآبادی