حسرت رہی کوئی یہاں دیدہ ور ملے

حسرت رہی کوئی یہاں دِیدہ ور مِلے
لیکن تِری گلی میں سبھی کم نظر مِلے
ایسے بھی آشنا ہیں نہ دیکھا جنہیں کبھی
نا آشنا تھے وہ بھی جو شام و سحر مِلے
شاید اس لیے ہمیں منزل نہ مِل سکی
جتنے بھی ہم کو لوگ مِلے، راہبر مِلے
لکھی تھیں جن پہ اپنے جنوں کی حکایتیں
آوارگی میں ایسے بھی کچھ بام و در مِلے
کیا کیا نظر نظر میں ہوئی گفتگو نہ پوچھ
مدت کے بعد جب وہ سرِ رہ گزر مِلے
ہم کو تو داغِ دل کے سوا کچھ نہ مِل سکا
ان بستیوں میں پیار کسی کو مگر مِلے
جالبؔ ہوائے لعل و گہر تھی، نہ آج ہے
وہ سنگِ در عزیز ہے وہ سنگِ در مِلے

حبیب جالب