ساغر سفالیں کو جام جم بنایا ہے

ساغرِ سفالیں کو جامِ جم بنایا ہے
پھیل کر میرے دل نے میں کو ہم بنایا ہے
ناز ہے خلیلی کو جس نقشِ ثانی پر
گرچہ آذری ہی نے یہ حرم بنایا ہے
بت ہزار توڑے ہیں لاکھ ٹکڑے جوڑے ہیں
زندگی نے جب جا کر اک صنم بنایا ہے
بے کسئ دل اپنی دور کی ہے یوں میں نے
دوسروں کے غم کو بھی اپنا غم بنایا ہے
زلف کی طرح اس کو بس سنوارتے رہیے
زندگی کو فطرت نے خم بہ خم بنایا ہے
میں نے ذرے ذرے کو مسکراہٹیں دی ہیں
تم نے ہر ستارے کو چشمِ نم بنایا ہے
مدعئ جدت ہے تیری فکر اے زاہد
میکدے کی اینٹوں سے کیوں حرم بنایا ہے

پرویز شاہدی