وہ اجنبی: وہ مہر و ماہ و مشتری کا ہم عناں کہاں گیا

وہ اجنبی

وہ مہر و ماہ و مشتری کا ہم عناں کہاں گیا

وہ اجنبی کہ تھا مکان والا، مکاں کہاں گیا

ترس رہا ہے دل کسی کی داوری کے واسطے

پیمبرانِ نِیم جاں! خدائے جاں کہاں گیا

وہ ملتفت بہ خندہ ہائے غیر کس طرف ہے آج

وہ بے نیازِ گِریہ ہائے دوستاں کہاں گیا

وہ ابر و برق و باد کا جلیس ہے کدھر نہاں

وہ عرش و فرش و ماوراء کا رازداں کہاں گیا

وہ میزباں کہاں ہے جس کی دِید بھی محال تھی

جو آج تک نہ آ سکا وہ میہماں کہاں گیا

بجھی پڑی ہے ماہ تاب و کہکشاں کی انجمن

وہ صدرِ بزمِ ماہ تاب و کہکشاں کہاں گیا

یہ کائناتِ آب و گِل ہے جس کے غم میں مضمحل

دیا ہے جس نے سوزِ دل، وہ مہرباں کہاں گیا

چمک رہی ہیں دُور دُور تک اُداس پٹڑیاں

مسافرو! بتاؤ میرِ کارواں کہاں گیا

مصطفیٰ زیدی