دل تری راہگزر بھی تو نہیں کر سکتے

دل تِری راہگزر بھی تو نہیں کر سکتے
ہم تِری سمت سفر بھی تو نہیں کر سکتے
زندگی کاٹنا دشوار ہے اب اپنے بغیر
اور ایسے ہی بسر بھی تو نہیں کر سکتے
اب ہمیں تیری کمی بھی نہیں ہوتی محسوس
پر تجھے اس کی خبر بھی تو نہیں کر سکتے
جی تو کرتا ہے کبھی اپنے گلے بھی لگیے
لیکن آئینے میں در بھی تو نہیں کر سکتے
کس طرح سے نئی ترتیب بھلا دی جائے
کچھ اِدھر سے ہم اُدھر بھی تو نہیں کر سکتے
صَرفِ نظارہ ہوئی جاتی ہیں آنکھیں اپنی
ہم مگر صَرفِ نظر بھی تو نہیں کر سکتے
صرف ناکردہ کی حسرت ہی نہیں ہے درپیش
جو ہُوا، بارِ دِگر بھی تو نہیں کر سکتے

ضیا المصطفیٰ ترک