وہ نیچی نگاہیں وہ حیا یاد رہے گی

وہ نیچی نگاہیں وہ حیا یاد رہے گی

مِل کر بھی نہ مِلنے کی ادا یاد رہے گی

ممکن ہے مِرے بعد بھُلا دیں مجھے لیکن

تاعمر انہیں میری وفا یاد رہے گی

جب میں ہی نہیں یاد، رفیقانِ سفر کو

حیراں ہوں کہ منزل انہیں کیا یاد رہے گی

کچھ یاد رہے یا نہ رہے ذکرِ گلستاں

غنچوں کے چٹخنے کی صدا یاد رہے گی

محروم رہے اہلِ چمن، نکہتِ گُل سے

بے گانگئ موجِ صبا یاد رہے گی

پلکوں پہ لرزتے رہے انورؔ جو شبِ غم

مجھ کو انہیں تاروں کی ضیا یاد رہے گی

انور صابری