روح پرچھائیں ہے پرچھائیں سے کب پیار ہوا

روح پرچھائیں ہے پرچھائیں سے کب پیار ہُوا
جسم ہی تو وہ حقیقت ہے کہ دلدار ہوا
کوئی صورت بھی تو اس جیسی نہیں یاد آتی
کیسا لمحہ تھا کہ اِک عمر کا آزار ہوا
تجھ سے پہلے تو بہت سادہ و معصوم تھا دل
تجھ سے بِچھڑا تو کئی بار گنہگار ہوا

کیا قیامت ہے کہ جس نے مِری دنیا لُوٹی

وہ بھی اقرارِ محبت کا طلبگار ہوا
نغمۂ صُبح تو چھیڑا تھا، مگر کیا کیجئے
سازِ اِحساس کا ہر تار شبِ تار ہوا
قد و گیسُو ہی بنے اپنے لیے دار و رسن
کوئی منصور کبھی یوں بھی سرِ دار ہوا
سالہا سال میں تکمیل کو پہنچی یہ غزل
دلِ وحشی، کبھی مائل، کبھی بے زار ہوا

اسرار ناروی

ابن صفی