بڑی پرسکون تھی یہ زندگی نیا درد کس نے جگا دیا

بڑی پُرسکون تھی یہ زندگی نیا درد کس نے جگا دیا
کسی بے نیاز نگاہ نے، مِری وحشتوں کو بڑھا دیا
مِرے کم سُخن کا یہ حُکم تھا کہ کلام اُس سے میں کم کروں
مِرے ہونٹ ایسے سِلے کہ پھر مِری چُپ نے اس کو رُلا دیا
مجھے اپنے عشق پہ ناز تھا، مگر اس کے قول کا پاس تھا
مِرے چارہ ساز بھی رو پڑے، وہ کمالِ ضبط دِکھا دیا
اسے شعر سُننے کا شوق تھا مجھے عرضِ حال کا ذوق تھا
اسی ذوق و شوق میں ایک دن اسے‌ حالِ دل سنا دیا
وہ نگاہ کیسی نگاہ تھی، یہ گریز کیسا گریز تھا
مجھے دیکھ کر بھی نہ دیکھنا اس ادا نے راز سُنا دیا
کسی نام سے کسی یاد سے، مِرے دل کی بزم سجی رہی
کبھی یہ چراغ جلا دیا، کبھی وہ چراغ جلا دیا

خلیل اللہ فاروقی