ترا آستاں ہے مرا حرم ترا کوچہ قبلہ مقام ہے

تِرا آستاں ہے مِرا حرم تِرا کُوچہ قِبلہ مقام ہے
تِری یاد میری نماز ہے تِرا عشق میرا امام ہے
نہ رہے جو پیشِ نگاہ تُو مجھے کیوں ہو سجدے کی آرزو
جہاں تُو نہ ہو مِرے رُوبرُو وہاں سجدہ کرنا حرام ہے
پئے سجدہ شوق سے ہمنشیں جُھکی جا رہی ہے مِری جبیں
یہ دیار کیسا دیار ہے؟، یہ مقام کیسا مقام ہے؟
ہے شرابِ عشق عجیب شے جسے پِیجے دونوں جہان میں
نہ یہاں پہ پینا حرام ہے، نہ وہاں پہ پینا حرام ہے
میں مقیم کُوچۂ یار ہوں، جو ہیں دیر و کعبہ تو کیا کروں
درِ یار سے ہے غرض مجھے، درِ یار سے مجھے کام ہے
یونہی پُرنمؔ آنسو بہائے جا، یونہی رو کے یار منائے جا
کہ پسند اس کو اسی طرح تِرے دردِ دل کا پیام ہے

پرنم الہ آبادی