اس وجود روشن سے ہر طرف اجالا ہے

عارفانہ کلام نعتیہ کلام

اس وجودِ روشنﷺ سے ہر طرف اجالا ہے

چاند اس کا پرتو ہے سورج اس کا ہالہ ہے

فکر و ذکر بھی اس کا، ہجر و وصل بھی اس کا

بس اسی کی چاہت ہے،۔ بس وہی حوالہ ہے

سب کے سب جہانوں میں اس کی حکمرانی ہے

سب کے سب زمانوں میں اس کا بول بالاہے

تم فنا بقا جانو، ایک بات تو مانو

وہ بلند و بالا تھا، وہ بلند و بالا ہے

لب پہ ذکر جاری ہے، وجد و کیف طاری ہے

مصطفیﷺ کی محفل کا، رنگ ہی نرالا ہے

زندگی جہاں بھی ہے، اس کے نام لیوا ہیں

فرش و عرش سے بالا، اس کا بول بالا ہے

ما ورا ہے ذات اس کی، بیکراں صفات اس کی

دھوم شش جہات اس کی، وہ حدوں سے بالا ہے

نور کی جو بارش ہے، اس کے رخ کی تابش ہے

سانس کی جو مالا ہے، ذکر حق تعالیٰ ہے

تابش الوری