میں وہ دریا ہوں جو کوزے میں اتارا ہوا ہوں

کھِل سکا ہوں نہ کسی آنکھ کا تارا ہوا ہوں

کیا کہوں پھینکا گیا ہوں، کہ اتارا ہوا ہوں

وہ بھی میں تھا جسے پلکوں پہ بٹھایا تُو نے

یہ بھی میں ہوں جو تِرے ہجر کا مارا ہوآ ہوں

وہ جو اب میرے خد و خال پہ ہنستا ہے بہت

میں اسی شخص کے ہاتھوں سے سنوارا ہوا ہوں

خاک ہو کر بھی زمیں پر تجھے ڈھونڈا میں نے

گاہے گاہے تِری خاطر میں ستارا ہوا ہوں

تُو وہ موسم ہے جو مشکل سے میسر آئے

میں وہ لمحہ ہوں جو فرصت سے گزارا ہوا ہوں

مٹھی بھر ریت سمجھ کے نظر انداز نہ کر

میں وہ دریا ہوں جو کوزے میں اتارا ہوا ہوں

فرخ عدیل