فصیل شب سے نکلنے کے راستے تھے بہت

 فصیلِ شب سے نکلنے کے راستے تھے بہت

قدم اٹھانے سے پہلے وہ سوچتے تھے بہت

یہ واقعہ ہے کہ کہنے کو کچھ رہا ہی نہ تھا

وگرنہ اس سے پسِ پردہ رابطے تھے بہت

سوا غبار کے کچھ بھی نظر نہیں آتا

ہمارے ساتھ سرِ دشت قافلے تھے بہت

حریمِ ناز میں میرا ورود سہل نہ تھا

قدم قدم پہ قیامت کے مرحلے تھے بہت

تِرے ہی بارے میں خوش فہمیاں نہ تھیں دل کو

خود اپنے بارے میں مجھ کو مغالطے تھے بہت

حامدی کاشمیری