خوش بچھڑ کر رہ سکا تُو بھی نہیں میں بھی نہیں
ہاں مگر یہ مانتا تُو بھی نہیں میں بھی نہیں
عمر اک دوجے کے پاؤں کاٹنے میں کاٹ کر
آج پیروں پر کھڑا تُو بھی نہیں میں بھی نہیں
ایک دُوجے کو رُلانے کا یہی انجام تھا
عمر ساری پھر ہنسا تُو بھی نہیں میں بھی نہیں
دوسروں سے مانگنے کیا پارسائی کے ثبوت
سچ تو یہ ہے پارسا تُو بھی نہیں میں بھی نہیں
اب تو میں جس اِبتلا میں مُبتلا ہوں اس کا حل
اے مِرے مُشکل کشا تُو بھی نہیں میں بھی نہیں
ایک چُپ ہے جو نِگلتی جا رہی ہے شہر کو
اور اس پر بولتا تُو بھی نہیں میں بھی نہیں
احمد فرہاد
No comments:
Post a Comment