یک بیک پنجرۂ الفت میں پھڑکنے لگ جائے
طائرِ ہجر مِری راہ نہ تکنے لگ جائے
کاش میں دل تِرے سینے میں اتاروں اپنا
اور مِرا غم تِری رگ رگ میں دھڑکنے لگ جائے
عین ممکن ہے کسی روز میں نکلوں گھر کو
اور مسکن کی طلب راہ میں تھکنے لگ جائے
لمس کا جام مِرے ہاتھ سے چھوٹے یکدم
آنکھ شرمندۂ غم ہو کے چھلکنے لگ جائے
روح تہہ خانۂ حرمت میں چھپا لے خود کو
جسم بچے کی طرح رونے بلکنے لگ جائے
پاس رہ کر بھی نہ مہندی کی مہک ماند پڑے
دور رہ کر بھی وہ کنگن نہ کھنکنے لگ جائے
کیسے اس شخص کو اپنے سے الگ کر لوں میں
کیسے اک صبح اندھیرے کو لپکنے لگ جائے
ہم تہی دستِ جنوں، مژدۂ دل کس سے کہیں
سارا عالم نہ اسی غم میں تھرکنے لگ جائے
لاکھ موسم کا نیا رخ مجھے چھیڑے باقی
لاکھ بارش میں کوئی آگ بھڑکنے لگ جائے
وجاہت باقی
No comments:
Post a Comment